Shkarko Denoncimin ne pdf
I nderuar z. Komisioner!
Të nderuar Drejtues të Administratës së KQZ-së!
Të nderuar Anëtarë të Komisionit të Ankimimeve dhe Sanksioneve!
Sipas raportimit të institucionit përkatës në ndërfaqen e raportimeve të KQZ-së (shih Lidhjen 1, pika III), eventi organizohej nga Administrata e Kopshteve dhe Çerdheve të Bashkisë Tiranë, me folës kryesor Kryetarin e Bashkisë Tiranë, z. Erjon Veliaj dhe pjesëmarrës të nivelit të lartë, jo diskutant, znj. Zhaneta Beqiri, Drejtor i Përgjithshëm i Administratës së Kopshteve dhe Çerdheve. Referuar raportimit nuk kishte të tjerë diskutantë apo pjesëmarrës të nivelit të lartë në event.
Aktiviteti i zhvilluar, referuar transmetimit LIVE në median televizive TV News24 si dhe videos së transmetuar LIVE në facebook-un e Kryetarit të Bashkisë z. Erion Veliaj, pati pjesëmarrës në cilësinë e folësve edhe dy deputetë të Kuvendit të Shqipërisë, të zgjedhur në Qarkun Tiranë, z. Plarent Ndreca dhe znj. Ermonela Felaj. (shihni për më shumë Lidhjen 1, pika I e II).
Së pari, vendosim në dukje se pjesëmarrja si folës e dy deputetëve në një event institucional të organizuar nga një institucion publik në varësi të Bashkisë Tiranë, titullari i të cilës është zgjedhur si kandidat i të njëjtës forcë politike me deputetët, në periudhën katër muaj para zgjedhjeve, në gjykimin e KRIIK, përbën përdorim të burimeve shtetërore për përfitim elektoral nga deputetët në fjalë dhe forca politike që ata përfaqësojnë, Partia Socialiste e Shqipërisë, si dhe cënon barazinë në garën zgjedhore.
Kjo pasi pjesëmarrja e tyre në një event të tillë, të organizuar me fonde publike sjell një përfitim politik të drejtpërdrejtë në favor të tyre dhe Partisë Socialiste, duke e paraqitur projektin si një arritje të partisë dhe jo si një investim të financuar nga taksapaguesit.
Për analogji, kujtojmë se sipas pikës 3 të nenit 81 të Kodit Zgjedhor të Republikës së Shqipërisë, “Transmetimi i veprimtarive të institucioneve publike, qendrore ose vendore, llogaritet në kohën e transmetimit të subjektit zgjedhor, të cilit i përket titullari i institucionit, nëse veprimtaria ndjek qëllime elektorale. Veprimtaria ndjek qëllime elektorale kur ajo synon promovimin e arritjeve institucionale, të investimeve, inaugurimeve ose ecurinë në ndërtimin e punëve publike ose kur promovon aspekte specifike të programit elektoral të subjektit zgjedhor.”
Pra referuar këtij përkufizimi, është e qartë se vullneti i legjislatorit në hartimin e Kodit Zgjedhor ka qenë se eventet që synojnë promovimin e arritjeve institucionale, investimet apo inaugurimet ndjekin qëllime elektorale.
Së dyti, nga një pikëpamje formale, vëmë në dukje se prania e dy deputetëve në aktivitetin e zhvilluar nuk është njoftuar paraprakisht nga organizatorët e eventit, në kundërshtim me pikën 5 të nenit 5 të Vendimit nr. 9, datë 24.12.2020 të Komisionit Rregullator, sipas të cilit “Raportimi duhet të përmbajë, datën dhe orën e zhvillimit të veprimtarisë̈, qarkun, bashkinë adresën ku ajo zhvillohet, llojin e saj, qëllimin dhe tematikën e veprimtarisë, emër mbiemër të personave pjesëmarrës të cilët përfaqësojnë nivelin më të lartë hierarkik shtetëror në aktivitetin përkatës, institucionin të cilit i përkasin, emër mbiemër të folësve të mundshëm dhe pozicionin e tyre, me pjesëmarrje të medias ose jo, pasqyruar në rrjete sociale, median online, ose jo.
Pika 1 e nenit 10 të Vendimit nr. 9, datë 24.12.2020 të Komisionit Rregullator, përcakton se “Në rastet kur subjektet e parashikuara në pikën 4, të nenit 4, të këtij vendimi, nuk raportojnë, raportojnë pjesërisht ose zhvillojnë veprimtarinë, pavarësisht ndalimit të bërë nga Komisioni Qendror i Zgjedhjeve, kur shkelja nuk përbën vepër penale, dënohen nga Komisioneri Shtetëror i Zgjedhjeve me gjobë nga 3000 (tremijë) deri në 90 000 (nëntëdhjetë mijë) lekë, sipas nenit 171, pika 1, të ligjit nr. 10019, datë 29.12.2008, “Kodi Zgjedhor i Republikës së Shqipërisë”, të ndryshuar.
Për sa më sipër, KRIIK denoncon Administratën e Kopshteve dhe Çerdheve, Bashkia Tiranë për raportim të pjesshëm të aktivitetit të zhvilluar në datën 10 shkurt 2024 dhe i kërkon Komisionit Qendror të Zgjedhjeve të veprojë sipas parashikimeve të ligjit.
Në gjykimin e KRIIK, KQZ-ja nevojitet që përpos sanksionimit të titullarit përkatës të institucionit, të njoftojë dhe paralajmërojë me shkrim Partinë Socialiste të Shqipërisë në favor të së cilës është kryer shkelja e mësipërme, duke i kërkuar marrjen e masave nga ana e saj për disiplinimin e deputetëve si dhe të përfaqësuesve politikë të saj për mos-përsëritjen e shkeljeve të ngjashme në të ardhmen.
Gjithashtu, nxitet KQZ-ja t’i dërgojë një informacion të detajuar mbi këtë ngjarje Kuvendit të Shqipërisë, për tu tërhequr vëmendjen Deputetëve dhe për të parandaluar në të ardhmen përdorimin e aktiviteteve institucionale për avantazh elektoral prej tyre.
*Ky Denoncim përmban një Lidhje ku ilustrohen problematikat e përmendura, me fotografi të faqeve përkatëse dhe lidhje për në faqet e internetit. Për të parë lidhjen, shkarkoni Dokumentin e dërguar KQZ-së.