Shkarko Denoncimin ne pdf
I Nderuar Z. Komisioner!
Të nderuar Kolegë të Administratës së KQZ-së!
Duke ju falënderuar për bashkëpunimin në vazhdimësi, ju paraqesim më poshtë një denoncim të KRIIK në lidhje me zhvillimin e një aktiviteti, pavarësisht ndalimit të Komisionit Qendror të Zgjedhjeve.
Me Vendimin nr. 367 datë 15.04.2023 Komisioneri Shtetëror i Zgjedhjeve ka vendosur ndalimin e zhvillimit të tetë aktiviteteve të raportuara për t’u zhvilluar nga Bashkia Tiranë.
Vendimmarrja është bazuar në arsyetimin se “Komisioneri Shtetëror i Zgjedhjeve, nga të dhënat e paraqitura në raportim ka konstatuar se, aktivitetet e raportuara nga institucioni publik, Bashkia Tiranë, me pjesëmarrjen e personave partiakë, në kuadër të fushatës zgjedhore, përbëjnë veprimtari të ndaluara, në kuptim të nenit 91 të ligjit nr. 10019, datë 29.12.2008 “Kodi Zgjedhor i Republikës së Shqipërisë”, të ndryshuar.
Një prej aktiviteteve të ndaluara për t’u zhvilluar ishte edhe ai me temë “Takim me Deputetët dhe Anëtarët e rinj të KB”, me vend zhvillimi: “Selia PS”, me datë zhvillimi 17.4.2023, ora 17:30. Ky ndalim është pasqyruar edhe në ndërfaqen e aktiviteteve të ndaluara nga KQZ.
KRIIK angazhoi një monitorues i cili në ditën dhe orën e caktuar ishte prezent në selinë e PS për të monitoruar nëse takimi do të kryhej.
Pavarësisht se monitoruesit të KRIIK iu ndalua hyrja në selinë PS që të mund ta vëzhgonte drejtpërdrejt kryerjen e aktivitetit (megjithëse i pajisur me akreditimin si vëzhgues prej Komisionit Qendror të Zgjedhjeve), nga bisedat me persona të grumbulluar në hyrjen e selisë së PS ai mundi të konfirmonte se aktiviteti u zhvillua pavarësisht ndalimit të vendosur nga KQZ.
Për sa më sipër, KRIIK denoncon me ashpërsi këtë sfidë të zbatimit të ligjit dhe Institucionit të KQZ-së, të disatën e këtij lloji.
Në gjykimin e KRIIK, KQZ-ja nevojitet të tregojë ashpërsinë e ligjit ndaj atyre që e sfidojnë atë, nga njëra anë, si dhe funksionalitetin e mekanizmit të ndërtuar pas reformës zgjedhore të vitit 2020 për të parandaluar abuzimin me burimet shtetërore, nga ana tjetër.
Një qëndrim pasiv apo interpretues ndaj ligjit çon në anashkalimin e tij në vazhdimësi, siç e tregon më së miri ky rast i përsëritur i injorimit të vendimeve të KQZ-së prej zyrtarëve publikë, në favor të Partisë Socialiste të Shqipërisë.
Në gjykimin e KRIIK, KQZ-ja nevojitet të sanksionojë përpos titullarëve vendorë edhe subjektin zgjedhor “Partia Socialiste e Shqipërisë”, e cila është përfituesja kryesore nga ky aktivitet i ndaluar (neni 172 pika 1 e Kodit Zgjedhor).