Në datë 11 gusht 2022, Koalicioni për Reforma, Integrim dhe Institucione të Konsoliduara (KRIIK) publikoi Deklaratën “Dështimi i Komisionit të Reformës Zgjedhore, këmbanë alarmi për zgjedhjet e ardhshme dhe proceset e tjera reformuese të nevojshme për vendin”.
Në Deklaratë, KRIIK vë në dukje dështimin politikisht dhe de-facto të veprimtarisë së Komisionit të Posaçëm Parlamentar për Reformën Zgjedhore, në kundërshtim me zotimet e bëra dhe angazhimet e marra, çka përbën një moment absurd, totalisht joserioz dhe mjaft shqetësues për institucionin më të lartë të vendit, Kuvendin e Shqipërisë.
Në Deklaratë, KRIIK thekson se përpara Legjislaturës aktuale të Kuvendit të Shqipërisë shtrohen dhe pritet të zhvillohen përgjegjësi madhore politike e kushtetuese, duke kthyer në normalitet funksionimin e shtetit dhe sistemit tonë demokratik; një qasje e cila duket se mungon, përsa kohë deputetët shqiptarë ngurrojnë të pranojnë fuqinë dhe luajnë rolin e tyre të dhënë nga Kushtetuta e Republikës, se ata përfaqësojnë në Parlament vullnetin e deleguar të sovranit.
Dështimi i qëllimshëm i Komisionit duket se është në vazhdën e zhbërjes së aspiratave të Marrëveshjes Politike të 5 Qershorit 2020, shmangies nga diskutimi publik e institucional të problematikave madhore që prekin lirinë e votës dhe integritetin e zgjedhjeve, si dhe ruajtjes së status quo-së në demokracinë shqiptare, rrjedhimisht edhe të të njëjtave standarde dhe pritshmëri që do t’iu ofrohen qytetarëve shqiptarë në zgjedhjet e ardhshme vendore.
Në përmbyllje të deklaratës, KRIIK sjell në vëmëndje se në këto momente shumë të rëndësishme për të ardhmen e vendit dhe të demokracisë, në raport me sfidat rajonale e ndërkombëtare, është e domosdoshme që politika shqiptare të tregojë vizion e maturi të lartë, duke dalë sa më parë nga politika konfiktuale e interesave minore, personale dhe nga propaganda e ditës, duke i dhënë hapësirën e duhur e nxitur funksionimin normal ligjor e demokratik të mekanizmave, institucioneve dhe të gjithë aktorëve dhe faktorëve në shoqëri në funksion të një demokracie të gjallë e funksionale.
Gjithashtu iu bën thirrje partive politike parlamentare, në veçanti lidershipit politik të maxhorancës dhe Kreut të Qeverisë, që të ushtrojnë dhe zhvillojnë përgjegjësitë e tyre politike e institucionale për të funksionalizuar demokracinë në vend, ndërmarrë dhe bërë përpjekje të vazhdueshme për të zhvilluar e siguruar një dialog politik domethënës, dakordësuar politikisht qasje vizionare dhe konkretizuar më pas ato në procese reformuese të hapura në parlament, ku të sigurohet pjesëmarrja domethënëse dhe gjithëpërfshirëse e qytetarëve dhe aktorëve të tjerë me ekspertizë.
Deklarata në formatin .pdf mund të shkarkohet KËTU.
Tiranë më 11.08.2022!