Datë 27 Prill 2021, Ora 22:30 pm – KRIIK vijon vëzhgimin në 68 KZAZ, në të cilat vazhdon procesi i numërimit të votave për kandidatët dhe subjektet zgjedhore. Në 23 zona të administrimit zgjedhor ka përfunduar totalisht numërimi, si për subjektet ashtu edhe për kandidatët.
Procesi i numërimit për subjektet, në qendrat në të cilat nuk ka përfunduar ende, sipas informacioneve të vëzhguesve të KRIIK do të vijojë sot deri në përfundim, duke respektuar vendimin e Komisionerit, sipas të cilit në të gjithë vendin numërimi për kandidatë do të fillojë nesër në orën 9:00.
Është për tu vlerësuar ndjekja e nga afër e të gjithë procesit, nga ana e KQZ, për të siguruar integritetin e këtij procesi shumë të rëndësishëm. Në të njëjtën kohë është për tu vlerësuar edhe udhëzimi i Komisionerit për caktimin e orarit për rinisjen e procesit të numërimit për kandidatët, duke u lejuar kështu që ky numërim të jetë i njëkohshëm.
KRIIK vlerëson qëndrimin e KQZ, që pas incidentit në KZAZ 30 në Tirana me vëzhguesit, vendosi të shfuqizimin e të gjithë akreditimeve të vëzhguesve politikë, dhe akreditimin me vëzhguesve të rinj, duke siguruar prezencë të maturuar të forcave politike në qendrat e numërimit. Në të njëjtën kohë, duke shmangur personat e paautorizuar në këto qendra të cilët herë pas herë kanë tensionuar situatën.
Megjithatë, është vërejtur se në KZAZ 21 në Durrës, ka pasur dyndje të personave të paautorizuar, dhe komisionet zonale dhe partitë politike duhet të marrin masa që këto qendra numërimi të lejohen vetëm personat e akredituar.
Kjo është jo vetëm e paligjshme por vendet e numërimit të votave duhet të sigurojnë qetësinë e nevojshme për të gjithë vëzhguesit politikë dhe numëruesit, të cilët duhet të raportojnë institucionalisht të gjitha gjetjet që mund të kenë përgjatë vëzhgimit.
Me rezultatet të cilat janë drejt fundit për subjektet zgjedhore, është e rëndësishme që partitë e opozitës dhe veçanërisht maxhoranca të presë deri në përfundim të procesit të numërimit, duke respektuar të gjitha rregullat e përcaktuara nga KQZ, në të njëjtën kohë duke respektuar të gjithë vëzhguesit të cilat qëndrojnë në këto qendra numërimi. Të gjitha palët kanë si qëllim që procesi të ecë sa më shpejt, dhe vullneti i zgjedhësve të lexohet deri në votën e fundit.
KRIIK nxit KQZ-në, që të ndjekë zbatimin e urdhrit të marrë ditën e djeshme, për vëzhguesit. Gjithashtu KRIIK vlerëson procesin e transparencës nga KQZ, në faqen e saj në ueb , por do të ishte me vend që pjesa tjetër e kësaj faqe, që ka të bëjë më informacionet mbi institucionin dhe veprimtarinë e tyre të mëparshme duhet të jetë ende funksionale dhe e disponueshme për informacion.
Një shqetësim madhor, mbetet evidentimi i fletëve të pavlefshme të votimit. Deri në këto momente janë deklaruar si të pavlefshme 81.952. Sipas vëzhgimit të KRRIK në këto qendra numërimi dhe komunikimit me komisionerit, nga vëzhguesit në terren, është vërejtur se në një pjesë të mirë, këto fletë janë shpallur të pavlefshme për shkak se është shënjuar më shumë se një subjekt zgjedhor, apo është votuar për subjekt zgjedhor dhe një kandidat të një subjekti tjetër zgjedhor.
KRIIK i sugjeron KQZ-së dhe të gjithë institucioneve përkatëse që të bëhet transparencë në lidhje me këto fletë votimi, për të kuptuar shkakun e këtyre numrave të lartë. Është e rëndësishme që të kuptohet nëse plotësimi në mënyrë jo korrekte i fletës së votimit vjen nga mosinformimi i votuesve, përgjegjësi e cila shkon drejtpërdrejt tek forcat politike, sidomos maxhorancës, dhe institucioneve përkatëse si KQZ apo CSC. Duhet kuptuar gjithashtu nëse vështirësitë e votuesve dhe keqkuptimet kanë ardhur nga fleta e votimit me numra, por më e rëndësishme është transparenca për këto fletë votimi, edhe nëse ato do të kenë apo jo ndikim në rezultat.
Subjektet zgjedhore duhet të qartësohen në lidhje me ketë çështje, e gjithashtu duhet bëre transparencë në lidhje me pamjet filmike, në të cilat shihen numërues, apo përfaqësues të forcave politike e të cilët shënjojnë në mënyre të paligjshme fletët e votimit, duke i shpallur ato të pavlefshme, apo tjetërsuar votën e qytetarit. Në raport me këtë sjellim në vëmendje numrin e ulët në fletëve të pavlefshme, deri në 1%, në KZAZ nr. 40 në Tiranë, ku votimi dhe numërimi u krye në mënyrë elektronike.
Një shqetësim tjetër lidhur me ecurinë e numërimit, dhe argumentet e lodhjes nuk duhet të jenë më pjesë ë arsyeve të cilat pengojnë numërimin. Është vërejtur se në dy KZAZ, 80 në Gjirokastër, dhe në KZAZ 32 në Tiranë, komisionerët e PD-së dhe LSI-së nuk janë paraqitur për vijimin e procesit, edhe pas pushimit të marrë. E njëjta situatë është edhe në KZAZ 60 Patos, ku komisionerët e të PD-së dhe LSI-së janë larguar, dhe procesi i numërimit vijon vetëm me përfaqësuesit e PS-së. Është e rëndësishme që të gjithë të përmbushin detyrimin e tyre ligjor, dhe kushtetues për këtë proces shumë të rëndësishme. U bëjmë thirrje të gjithë komisionerëve të mos braktisin detyrën. Në një garë elektorale, do të ketë humbës dhe fitues, por është e rëndësishme që asnjë mënyrë nuk duhet cënuar integriteti i këtij procesi, shkelja e të cilave mund të vendosë në pikëpyetje, të gjithë procesin zgjedhor dhe vullnetin e qytetarit.
Secili nga këta numërues, pavarësisht arsyeve personale apo politike, dhe ligjit, duhet t’i bëjë thirrje ndërgjegjes së tyre qytetare, për përmbyllur një proces zgjedhor i cili do të shënoje një bazë të mirë të reformave dhe aspiratave që ka vendi me zgjedhjen e parlamentit të ri.